Norræna félagið tekur við formennsku í FNF

Norræna félagið á Íslandi tók við formennsku í FNF-Foreningerne Nordens Forbund (Samband Norrænu félaganna) nú um áramót. Hrannar Björn Arnarsson formaður Norræna félagsins verður þar með formaður sambandsins árið 2020.

Hrannar Björn Arnarsson formaður Norræna félagsins

Viðfangsefni ársins eru mörg og spennandi á þessum samnorræna vettvangi. Í janúar verður ráðstefna á vegum FNF í Helsinki um rafræn skilríki innan Norðurlandanna og Eystrasaltsríkjanna (NOBID) og seinna á árinu ráðstefnur annars vegar um Norðurlöndin eftir BREXIT og hins vegar um möguleika á samnorrænum stórmótum í íþróttum.

Á innlendum vettvangi verður auk fastra verkefna, formennskuáætlun Íslands í Norðurlandaráði  fyrir árið 2020 gerð góð skil en í henni er lögð áhersla á að:

● standa vörð um lýðræðið með því að berjast gegn upplýsingaóreiðu og falsfréttum sem grafa undan því,
● standa vörð um líffræðilegan fjölbreytileika sem ógnað er af loftslagsbreytingum, mengun og fleiri þáttum sem rekja má til starfsemi manna,
● treysta böndin milli Norðurlandabúa með því að efla tungumálakunnáttu innan Norðurlanda til að stuðla að því að þeir geti í sameiningu tekist á við þessi stóru verkefni.
Sjá nánar á https://www.althingi.is/nr2020is


Í haust er fyrirhugað að halda ráðstefnu í samvinnu við Nordjobb um möguleika ungs fólk á sameiginlegum vinnumarkaði Norðurlanna.