Formaður Norræna félagsins á Suðurnesjum
Oddný G. Harðardóttir hefur tekið þátt í störfum á opinberum vettvangi yfir margra ára skeið. Hún er fyrrverandi alþingismaður og starfaði sem slíkur, bæði með Vestnorrænaráðinu og Norðurlandaráði samtals í ellefu ár en þar efldist og dafnaði áhuginn hennar á norrænu samstarfi. Norrænu félögin urðu til fyrir rúmum hundrað árum og á þeim grunni stendur norrænt samstarf þingmanna og ráðherra. Oddný er formaður Norræna félagsins á Suðurnesjum og gefur okkur hér innsýn í starfið, segir frá mikilvægi norræns samstarfs og deilir uppástungum af norrænni tónlist.
Getur þú sagt okkur frá starfinu á Suðurnesjum?
Norræna félagið á Suðurnesjum var stofnað 20. september 2025. Félögin í Suðurnesjabæ, Reykjanesbæ og Vogum sameinuðust þá í eitt Suðurnesjafélag. Stjórn félagsins byrjaði á því að heimsækja alla bæjarstjórana á svæðinu til að ræða hugsanlegt samstarf og vinabæi. Við stofnuðum leshring og erum búin að fara í gegnum eina sænska bók og dönsk bók verður fyrir valinu í apríl. Bogi Ágústsson var með erindi í febrúar í Reykjanesbæ um mýtur í sögu Íslands, um hvað er sagt og hvað er rétt um samskipti Íslands og Danmerkur. Viðburðurinn var bæði fróðlegur og fjölmennur. Í mars komu til okkar, í Suðurnesjabæ, þingkonurnar Dagbjört Hákonardóttir formaður Íslandsdeildar Norðurlandaráðs og Ása Berglind Hjálmarsdóttir annar varaformaður Vestnorrænaráðsins. Þær voru með áhugavert erindi um samstarf norrænna þingmanna og áherslur nú um stundir, þegar órói ríkir í heiminum. Þær svöruðu einnig margvíslegum spurningum frá áhugasömum gestunum sem sóttu viðburðinn.
Hvers vegna telur þú að norrænt samstarf sé mikilvægt?
Vinátta og traust einkennir norrænt samstarf, hvort sem það er á sviði mennta- og menningarmála, milli stofnanna og fyrirtækja eða á hinu pólitíska sviði. Það er mikilvægt að viðhalda þessu og treysta böndin á milli Norðurlandanna, ekki síst nú um stundir. Með því að vera bæði í óformlegum og formlegum samskiptum lærum við af hvort öðru, til gagns fyrir löndin öll. Þess vegna er mjög eftirsóknarvert að koma á norrænum samskiptum, sama við hvað fólk starfar. Í skólum með nemendaskiptum og fræðsluferðum kennara, í fyrirtækjum með samskiptum starfsmanna og stjórnenda, til að efla starfsemina og nýsköpun. Á sveitarstjórnarstiginu til að gera þjónustu við íbúa enn betri og svona mætti lengi telja.
Hvaða viðburðir eru framundan hjá félaginu á Suðurnesjum?
Næsti leshringur hjá félaginu fer fram 16. apríl í Hljómahöll í Reykjanesbæ þar sem bókin Kalak eftir Kim Leine verður tekin fyrir. Næsti viðburður hjá okkur verður síðan í september í Vogunum en þá kynnum við vetrarstarfið og gerum okkur glaðan dag, m.a. með söng og kynningu á norrænum bjór og snakki.
Hvernig getur fólk tekið þátt í starfinu og hvar getur það fylgst með upplýsingum um viðburði og dagskrá?
Á heimasíðunni http://www.norden.is er hægt að skrá sig í félagið. Upplýsingar eru einnig á Facebook síðu okkar Norræna félagið á Suðurnesjum. Þar eru viðburðir líka auglýstir og aðrar upplýsingar um norrænt starf á Suðurnesjum.
Hvað getur fólk gert til þess að bæta smá „norrænu” inn í sinn hversdag?
Hægt er að lesa norrænar bækur og hlusta á tónlist frá Norðurlöndunum. Norrænar glæpasögur eru spennandi og margverðlaunaðar. Á Storytel er hægt að velja norrænu tungumálin og æfa sig að hlusta á þau. Norrænn vísnasöngur er í uppáhald hjá mér. Ég hlusta oft á Cornelis Vreeswijk en hann ólst upp í Svíþjóð frá 12 ára aldri. Daninn Kim Larsen bregst ekki þegar maður þarf á því að halda að létta lundina.
Er eitthvað að lokum sem þú vilt bæta við?
Ég held að norrænt samstarf hafi aldrei verið mikilvægara. Stoðirnar sem það stendur á eru samskipti, skilningur og vinátta á milli fólksins sem býr á Norðurlöndum. Einmitt það getum við ræktað í gegnum norrænu félögin og þess vegna eru þau svo mikilvæg.
Apríl 2026