Getur þú sagt okkur frá því hvernig þú leiddist út í norrænt samstarf?

Áhuginn kemur einkum og sér í lagi vegna tungumálsins. Íslenska og skyldleikinn við Norðurlandamálin að finnsku undanskilinni. Áhuginn litast einnig af því að Ísland og Norðurlöndin deila og sögu sem skarast, gildum og oft og tíðum hefur samstarf hinna norrænu ríkja borið gjöfulan ávöxt. Mér finnst synd að ekki skuli almennt horft meira til Norðurlandanna á sem víðastan hátt og langar til að beita mér fyrir því. Og það er heldur ekkert launungarmál að gaman væri að geta beitt sér fyrir eins konar mótvægi við ensku áhrifin sem eru yfir og allt um kring. Ekkert gegn ensku per se. Það er bara fleira undir sólinni og því kannski gott að líta sér nær. Ég hefi og verið nokkuð á Norðurlöndunum, eins og líklega margir Íslendingar, og er einn af þeim sem finnst hann kominn heim í einhverjum skilningi þegar hann er í Kaupmannahöfn.

Hvers vegna telur þú að norrænt samstarf sé mikilvægt?

Með vísan í svarið á undan tel ég að okkur sé hollt að líta okkur nær. Það víkkar sjóndeildarhringinn, það opnar augun fyrir því að við deilum gildum, sögu og menningu með frændum okkar, það stækkar „áhrifasvæði“ íslenskunnar. Það er nefnilega þannig að vel má skilja tungumál frænda okkar að því gefnu að talað sé hægt, skýrt og rólega. Það er alltént ekki óvinnandi vígi. Eins er ýmislegt norrænt samstarf til staðar á margvíslegum grundvelli sem leitast ætti við að kynna fyrir almenningi. Auk þess bjargar samstarf á heilbrigðissviðinu bókstaflega lífi fólks. Ég þekki það af eigin raun.

Hvaða viðburðir eru framundan hjá félaginu á Suðurnesjum?

Í raun erum við enn að leitast við að koma mynd á starfið. Stjórnin fundar af og til og ræður ráðum sínum og leitast við að leggja línurnar. Mikill áhugi er á að skapa samstarfsgrundvöll við Kómedíuleikhúsið sem hefir einmitt sett norræn leikverk á svið. Í sumar verður vinabæjarmót í Vesturbyggð og er löngun til að leitast við að koma á ríkara vinabæjarsambandi á Vestfjörðum við bæi á Norðurlöndum. Starfið er mikið til á hugmyndastigi núna en orð eru til alls fyrst.

Hvernig getur fólk tekið þátt í starfinu og hvar getur það fylgst með upplýsingum um viðburði og dagskrá?

Rætt hefur verið að leitast við að koma á koppinn reglubundnum hittingum þar sem við og ráðum ráðum okkar. Við viljum gjarnan skapa faraveg til þess að fólk geti hist og unnið norrænu samstarfi brautargengi. Á þessum tímapunkti erum við með Facebook-síðu þar sem við auglýsum félagið og munum auglýsa það sem það kemur til með að standa að í framtíðinni: Facebook. Það er deginum ljósara að við þurfum að vera virkari og finna leiðir til þess atarna að virkja fólk og vekja áhuga fólks á Norðurlöndunum og norrænu samstarfi.

Hvað getur fólk gert til þess að bæta smá „norrænu” inn í sinn hversdag?

Það er nú það. Ég er mikið fyrir norrænar kvikmyndir og sjónvarpsþáttaraðir. Góðu heilli er RÚV þar alveg ágætt. Ég hefi það æ á stefnuskránni að lesa meira á norrænu málunum en illu heilli hefir mér ekki auðnast það sem skyldi. Já, og Danska konan var frábær.

Er eitthvað að lokum sem þú vilt bæta við?

Raun vil ég bara vísa til fyrra svars um að það er fleira undir sólinni en ensk/amerísk menning og hollt að líta einnig annað, t.d. til Grænlands, Álandseyja nú eða bara til Danmerkur.

Maí 2026